1 Corinthians 14

Kezapqetok keu aka keu qainŋi kun jijigö kalemŋi

1Urukalemgö könaŋi mönö wuataŋgöba malme aka nup memegö mötmöt kalem könaŋi könaŋi mi mönö buŋa qem aŋgubingö kapaŋ köla malme. Miaŋön ölöpmö, kezapqetok keu jijigö kalemŋi membingöra mönö köhöiba kapaŋ köla malme. 2Kunöŋ keu qainŋi kun jizawaŋön mönö ambazip neŋgöra qahöpmö, mönö Anutugörök mi jimakza. Uŋa Töröŋan sölölöhöiga keu asa-asambötŋi asuhui jimakzawaŋgöra tosatŋi neŋön keu mi qahö möt asarim waŋgimakzin. Mönö nanŋanök bauköm aŋgumakza.

3Tönpin maljinmö, kezapqetok keu jimakzawaŋön mönö ambazip urunini mem köhöiba naŋgöba urukölalep ak neŋgimamgöra aka keu jimakza. 4Kunŋan keu qainŋi kun jiba miaŋön mönö nanŋi uruŋi möhamgöba köhököhöi miwikŋaimakzapmö, kezapqetok keu jimakzawaŋön mönö urumeleŋ könagesö pakpak urunini möhamgöba mem köhöim neŋgimakza.

5Iŋini körekŋan keu qainŋi kun jimegöra mötzalmö, kezapqetok keu jimegöra mönö kapaŋ köla gwötpuk mötzal. Kezapqetok keu jimakzawaŋön mönö keu qainŋi kun jimakzawi, mi oŋgitza. Keu qainŋi kun jiba mi miaŋgöreŋök nanine keunöŋ meleŋjawi, mewö mönö öröröŋ akzahot. Mewö aiga keuŋan mönö urumeleŋ könagesö urunini möhamgöba mem köhöim neŋgiiga dop kölja.

6O urumeleŋ alaurupni, nöŋön eŋgöreŋ kaba keuŋi keuŋi qainŋi kun jibileŋak, mewö mönö denöwö mem ölöwak eŋgibileŋak? Mewö qahöpmö, Anutugöreŋ keu indelmam me mötmöt qainŋi kun eŋgimam me kezapqetok keu jimam me goro kusum eŋgimam ewö, miaŋön mönö mem ölöwak eŋgimam.

7Awölop me gita kulele me yuai kunöŋ liŋetkö imbiŋi miwikŋaimakzini, mieŋön mönö malmalŋini qahöpmö, könaŋini mönö mewöŋanök kewö ahöza: Kunŋan awölop laŋ uba me gita kulele laŋ qeiga miaŋön qetŋini nanŋök nanŋök qahö miwikŋaimakza ewö, liŋetkö imbiŋi mönö denöwö möt asaribinak? 8Mewöyök tömun um böligetka qetŋi törörök qahö möt asarizin ewö, daŋön mönö bim qeqegöra jöjöröbawak?

9Eŋgö könaŋinan mewöŋanök ahöza: Nesilamŋinan ambazip qahö möt asarimeaŋgö dopkeu laŋ jize ewö, kunŋan keu mewöŋi mönö denöwö möt asaribawak? Keu mewö jizei, miaŋön mönö öne laŋ luhutnöŋ anakza. 10Gölmeŋi gölmeŋi miaŋgöreŋ keu murutŋi murutŋi dawik jimakzini, mi daŋön mötpawakmö, töndup körek mieŋön mönö keugö könaŋi möt asaribingöra aka ahöze.

11Könaŋi miaŋgöra aka jimakzinmö, kunöŋ keu jiiga keuŋaŋgö könaŋi qahö mötzal ewö, nöŋön yaŋgö keuŋaŋgö kianŋi akiga yaŋön mewöyök nöŋgö keunaŋgö kiani akza. 12Eŋgö könaŋinan mewöŋanök ahöza: Iŋini nup memegö mötmöt kalemŋi kalemŋi buŋa qem aŋgubingö awöweŋgögetka dop kölja. Miaŋgöreŋ mönö kalem kewöŋi membingöra kapaŋ köla malme: Mötmöt kalem urumeleŋ könagesö uruŋini möhamgöba mem köhöimakzei, mönö mi buŋa qem aŋguba nupnöŋ algetka qetpuk akŋa.

13Miaŋgöra keu qainŋi kun jimakzawaŋön mönö kewö köuluköiga dop kölma, “O Anutu, keu jizali, mi meleŋmamgö mötmöt kalemŋi niŋgiman.” 14Miaŋgö könaŋi kewö: Nöŋön keu qainŋi kun jiba köuluközal ewö, nöŋgö uŋanan keuyök jiba köuluközapmö, urumötmötnan mönö ölŋi kun qahö miwikŋaiza.

15Miaŋgöra mönö denöwö akiga dop kölma? Nöŋön mönö uŋananöhök qahöpmö, urumötmötni mewöyök miaŋgöreŋ ala köulukömakŋam. Liŋet köla möpöseimakzali, mi uŋananöhök qahöpmö, urumötmötni mönö mewöyök miaŋgöreŋ ala kölakŋam. 16Gi Anutu uŋagan möpöseim waŋgizan ewö, ambazip omaŋi kunŋan totokoŋine kaba tata möpöseizanaŋgö könaŋi qahö möt kutumawi, yaŋön mönö “Keu mi ölŋa,” mi denöwö jibawak? Wania jizani, yaŋön mi qahö möt asariba öne tönpin tatza. 17Gi ölöp Anutu möpöseizanmö, keugan tosatŋi yeŋgö uruŋini qahö möhamgöba mem köhöim eŋgiza.

18Nöŋön körek iŋini eŋgoŋgita keuŋi keuŋi qainŋi kun mi gwötpuk jimakzali, miaŋgöra Anutu möpöseizal. 19Anutu möpöseizalmö, urumeleŋ könagesö uruŋe ambazip kusum eŋgimamgöra kapaŋ köla möt asarimegöra keu jitŋi 5 jimamgö mötpi ölŋi akza. Keuŋi keuŋi qainŋi kunöŋ keu jitŋi 10.000 nanaŋgörök jimamgö mötpi eretŋi akza.

20Urumeleŋ alaurupni, iŋini keu kewöta mötmörimakzei, miaŋgöreŋ mönö namande tandök mosöta ambazip ketaŋi yeŋgö dop mötmöriba malme. Bölöŋi akin jigetka miaŋgöreŋ mönö morösepsep ewö aka osimemö, mötkutukutuŋinan mönö ambazip ketaŋi aka malme. 21Mosesgö Köna keunöŋ keu kun kewö ohoget ahöza,

“Nöŋön kian ambazip kuŋgum eŋgibiga könagesö kieŋgöreŋ kaba jitŋinan keu tandökŋi kun jigetka laŋ welipkömakŋemö, mi töndup nöŋgö keuni qahö mötme. Kembu nöŋön mewö jizal.”
22Keu miaŋgö dopkeu qainŋi kun jiinga uruŋini qahö meleŋget yeŋön mötketka Anutugö aiwesökŋi ak eŋgizapmö, mötnarip ambazip neŋgöra miaŋön mönö aiwesökŋi kun qahö akza. Mi qahöpmö, kezapqetok keu jiinga miaŋön mötnarip ambazip neŋgöra Anutugö aiwesökŋi akza. Urumeleŋgö kopa yeŋön mi mötketka Anutugö aiwesökŋi kun qahö ak eŋgiza.

23Urumeleŋ könagesö eŋön tokoba körek eŋön keuŋi keuŋi qainŋi kun miaŋgöreŋ jigetka tosatŋan Buŋa keu qahö kusum eŋgigetka uruŋini qahö meleŋda öne miaŋgöreŋ öŋgömei, yeŋön mönö auruba kewö jibeak me qahö, “Nöröpŋinan mönö sohoi kahalalom akze.”

24Mewö jibeakmö, körek eŋön kezapqetok keuŋi keuŋi jigetka kunŋan Buŋa keu qahö kusum waŋgigetka mötnaripŋi qahö öne totokoŋine öŋgöma ewö, körek eŋön mönö siŋgisöndokŋi indela uruŋi qahö meleŋnöhaŋgö keuŋi jim tekögetka könaŋamŋi möt kutuiga aukŋe asuhuma. 25Uruŋaŋgö keu tölapŋi tölapŋi aukŋe asuhuiga yaŋön mönö dapköba eta Anutu waikŋi memba möpöseiba kewö jim miwikŋaiba qetma, “Anutunöŋ ölŋa eŋgö sutŋine malja.” Mewö. ^a

Urumeleŋ totokogö areŋi kewö:

26O urumeleŋ alaurupni, mewögöra nini mönö denöwö jiinga dop kölma? Iŋini Buŋa keugö tokomakŋei, miaŋgöreŋ mohot mohot eŋön mönö körek areŋini kun me kun mi kewö ahakŋe: Kunöŋ Buŋa liŋetkö areŋi aliga kunöŋ Buŋa keu kusum eŋgiiga kunöŋ Anutugö goro dölökŋi indeliga kunöŋ keu qainŋi kun jiiga kunöŋ mi meleŋma. Areŋ pakpak mi mönö urumeleŋ könagesö urunini kuŋguget köhöibingöra aka ahakŋe.

27Tosatŋan keu qainŋi kun jime ewö, ambazip 4 qahöpmö, yahöt me karöbut yeŋönök mönö totoko mohotkö uruŋe mewö jime. Yeŋönök mönö areŋinaŋgö dop awataŋ jigetka kunŋan mi meleŋma. 28Kunŋan keu meleŋmamgö dop qahö akza ewö, yeŋön mönö urumeleŋ könagesögö totokonöŋ keu bök tata nanŋinaŋgörök keuŋini qainŋi kun jigetka Anutunöŋ mötma. 29Kezapqetok ambazip yeŋgöreŋök yahöt me karöbut yeŋgörök mönö areŋ eŋgigetka keu jigetka tosatŋan mönö keuŋini kewötme.

30Mewö akŋemö, kunŋan totokonöŋ tariga Anutunöŋ goro keu uruŋe indeli mötza ewö, yaŋön mönö mi jiiga kezapqetok keu mutuk jizawaŋön keuŋi mosöta bök tatma. 31Ambazip körekŋan Anutugö goroŋi mötketka uruŋini naŋgöi ölöwakŋegöra iŋini mönö körek pakpak ölöp nalöŋini memba areŋinaŋgö dop kezapqetok keu jime. 32Kezapqetok ambazip yeŋön mönö ölöp uŋaŋini galöm kölgetka uŋaŋinan keu bapŋe anjeaŋgö dop akze.

33Anutunöŋ kizik-kazuk Toŋi qahöpmö, luai Toŋi akza. Miaŋgöra totokoŋini mönö areŋnöŋ wuataŋgöba ahakŋe. Ambazip sarakŋi yeŋgö sutŋine könagesö dop ahakzei, iŋini mewöyök mönö miaŋgö dop kewö ahakŋe: 34Ambi eŋön mönö urumeleŋ könagesögö totokoŋine keu bök tatme. Yeŋön keu jimeaŋgö dop qahö akzemö, Köna keu ahözawaŋgö dop mönö keu bapŋe anda malme.

35Ambinöŋ urumeleŋ könagesögö keu jim kutuba kusum eŋgiiga qahö dop kölja. Miaŋgöra keu kungö könaŋi mötpingö mötze ewö, yeŋön mönö miriŋine anda tata nanŋini apurupŋini qesim eŋgime.

36Anutugöreŋ Buŋa keu miaŋön mönö eŋgö sutŋineyök ahuyök me qahö? Keu miaŋön ahuba sehiba mala eŋgöreŋ kaba eŋgö buŋayök akza me qahö? 37Kunöŋ kewö jibawak, “Nöŋön kezapqetok keu jibiga Uŋa Töröŋan sölölöhöm niŋgiiga keu miambuk urumohot qahö akzal.” Mewö jizawaŋön mönö keu ki möt yaköma: Nöŋön ambigöra keu ohom eŋgizali, miaŋön mönö Kembugö jöjöpaŋ keu akza. 38Kunŋan keu miaŋgö kezap qahö ala silebile malja ewö, iŋini mönö azi yaŋgö keugö kude kezap al waŋgiba malme.

39Miaŋgöra urumeleŋ alaurupni, iŋini mönö kezapqetok keu jibingöra awöweŋgöba malme aka keu qainŋi kun jimegö soŋgoŋi mi kude alme. 40Mi kude almemö, yuai pakpak mönö törörök areŋ ala wuataŋgöba ahakŋe. Mewö.